Mid walba wuxuu islahaa adigaa ugu darnaan doona, waase kala darnaayeen. Jawaabahoodii waa kuwan hoos ku qoran.

Samatar :Aniga maalin baan laba rati dhaanshey, wiil yar oo rajay ahna aqalkii uga tegey. Goortaan gurigii cabbaar ka sii socdey ayaan gadaal fiirshey, mise labadii rati mid baa maqan. Ratigii aan wadey intaan geed ku xiray ayaan kii kale raadshey.

Meel uu suul iyo ciddi dhigay ayaan waayey, markaasaan kaan geedka ku ogaa ku soo noqday, saan waxaan u imid isagoo xariggii isku bakhtiiyey, haamihiina caymo beeleen, oo jajabeen.

Anigoo awrtii iyo haamihii ka fara maran yaan aqalkii dib ugu soo noqday, oo wiilkii inta dhabarka u ritay ceelkii la aaday, illaa waxaan biyo ugu keeno mahayee. Annagoo beer caddaad(aad u ooman) ah, yaan ceelkii oo daasad dheg leh oo qarkiisa saaran, inta soo qaaday maryahayagii inta isku gunguntey dhegta uga xiray oo ceelkii u ridey. Markaan u laadlaadshay bay iga fara baxsatay. Anigoo suxud saaxud laygu arag (qaawan), yarkiina sida gacantaas(qaawan) yahay baan meeshii ka tagnay. In door ah markaan soconey, ayaan ari daaqaya ku soo baxnay, ri’ dhashay oo danbarkii ku taagan yahay, arigana noogu soo xigtey baan inta lugta ku dhegey wiilkii qaruufiyey(nuujiyey).

Markuu dhamaystay, yaan anna mid kala qabsaday . Anigoo sacabsanaya baa naag ariga la joogtey ul ila dul martay.

Waan dhugtay, mise waa soddohday, markey i garatay ayey inta go’ ay huwaneyd ii soo tuurtay dibadda ku dhacday oo carartay. Waxaas oo kale ma idin qabsadeen.

Saxardiid:Allaylehe inaan waxba kuugu dhicin. War aniga laba wiil iyo gabar inan ah oo saddaxduba rajay yihiin ayaa dad laygu arkay, dhega aduunyana dameer keliya. Waxaan kaloo lahaa doon shiraac leh oo aan ku kaluumeysto, isla markaasna aqal aan ku hoyano oo harsano noo ahayd.

Annagoo ilaah mahaddii iska ladan, oo aan doonta dhexdeeda danbe kawtan ku ciyaarayno baa markab meel fog ka soo muuqday. Siduu u soo ganaa buu meel akteenna ah baroosinkii ku xirtay. Doontii baan inta shiraaca u taagey markabkii ka war doonnay, mise niman aanan af aqoon baa wata, markey garteen inaan dad masaakiina nahay, bay xoogaa raashina nasiiyeen iyagoon ju’ noo oran. Goortaan raashiinkii doontii saaray, baan kabahaygii middood tebey, saan gabadhaydii baan ku iri aabbe kab baa iga maqane markabka iiga soo fiiri inay iiga soo dhacday. Intay sara kacday bay hal haleel u fuushay markabkii. Markay arkeen in gabadhii markabka u soo fuushay, intayadii kalana aan doonta saarannahay, bay markabkii dhaqaajiyeen.

Markaan ogaaday inay inantii la baxsadeen ayaan doontii inta shiraacii u dejiyey iskala daba rogey, markaan in door ah cayrsanayney, ayaa duufaan yaab lihi baalka nagu qaadday oo na harqisay, anigoo sidii kalluunka dabaasha u aqiin, alwaax jabkii aan gacanta la helay baa igargaarey oo i badbaadiyey.

Doontii, dameerkii, wiilashii iyo gabadhii aan mid loo dhigo habari koolkoolin halkaasaa iigu danbeysay, ma waxaa i qabsadaa idin qabsaday?

Samaale:Labadiinna midna wax maqabsan, anigu mar malagaygii baan arkay marna waan ceeboobay, Waa marka horee annagoo siddeed nin ah ayaa col na qabtay.

Dawlis (Xarig dheer) ay siteen bay luqunta nooga wada xireen, oo na far fariisiyeen. Anigu midigtaan u xigay nin aad u wanaagsan oo Cirdaye la oran jirayna bidixda.

Mid iyaga ugu xoogga badnaa ayaa inta seef galka ka jiitay Cirdaye madaxa ka gooyey, oo ma joogsane lixdii noo dhexeysayna unuunka ka wada jaray. Markuu aniga damcay inuu qoorta iga gooyo, oo uu seefta kor u qaaday baan u gooyey, oo dibadda ku dhacay anoo dowliskii jiidanaya.

Maalintii oo dhan markay i cayrsanayeen, bay daaleen oo dan iiga hareen. Afar caanamaal haddaanan dad iyo duunyo toona arag, yaan reerkaan gabadha ka qabey guure ugu imid, markay diiftii iga muuqatay arkeen bay biyo aan ku habaq beelay i siiyeen, raar faraqu dheeraaday oo dumaashidey lahaydna aqalkii soddogey la’iigu gogley. Wan subag madoobe ah oo iska caddaaday ayaa la ii qalay. Intaan hilbihiisa sugayey, ayaa waxaa la ii keenay toobke caana ah, oo hal ayaamahaa dhashay laga soo lisay.

Waxyar haddaan joogey, baa xeero afku intaa la egyahay oo caddiin u badan iyo baaquli maraq ah la ii keenay. Wixii oo dhan baan feeraha dhigay, dabadeed madaxa iyo majaha duubay(seexday).

Gogoshaan ku hurdey baan intaan jiifay ku banay (shubmay), illaa ninkaas qatooyada ku raagey oo baruurta iyo caanaha geel iska badshay baan ahayee.