Ra'iisul Wasaaraha lagu muransanyahay xilkiisa Ra'iisul wasaarenimo Dr,Cumar Cabdirashiid Cali Sharmaake ayaa maanta isugu yeeray wasiiradii xukuumadiisa wuxuuna kala hadlay Sharci ahaanshaha hadalkii Shalay uu Madaxweynuhu warbaahinta ka sheegey oo uu kukala diray golaha xukuumadiisii,Kulankan oo saacado badan socday kadib ayaa waxaa warbaahinta la hadlay Ra'iisul Wasaare Dr,Cumar Cabdirashiid Cali wuxuuna sheegey in uusan waxba kajirin hadalkan uu madaxweynuhu shala jeediyey.

"Een Maanta waxaan yacni isugu wacay Wasiiradii Dawlada Dhamaantoodna shirka waa ay yimaadeen,waxaanu kawada hadlay jiritaanka warkii madaxweynaha kaso yeeray,Madaxweynaha anoo aad u xurmaynaya waan ka soo horjeesaday codsigii uu isoo jeediyey ee ahaa in aan xilka Ra'iisul Wasaarenimo iska casilo isla markaasna laka diro xukuumada"Ayuu yiri Dr,Cumar.

Cumar Cabdirashiid wuxuu sheegey in aysan dastuur ahayn kala dirista uu madaxweynuhu ku dhawaaqay,wuxuuna sheegey in uu xalay kulan la qaatay Madaxweynaha Soomaaliya islamarkaasna la'isku afgaran waayey kulankaas oo saacado badan socday,waxaana uu meesha ka saaray inuu marna ka tanaasulo xikiiisa isagoo taas ku macneeyey inuu qaranka u shaqaynayo isla markaasna sii wadi doono shaqadiisa Ra'isul Wasaare nimo.

"Waxaan ku celcelinayaa in go'aankii shalay ee Madaxweynuhu uusan sharciga waafaqsanayn,xalay madaxweynaha waanu is aragnay saacado badan ayaanuna wada joognay,waxaana u sheegey in uu hadalkiisuna khaldanaa anna aan ahay Ra'iisul Wasaare Sharci ah,marka hada Wasiirada waxaan u sheegey inay sharci yihiin isla markaasna sii wadaan shaqada ay qaranka u hayaan ayna xataa sii laba jibaaraan iska daa inay shaqada ka tagaan ama ay xilka ay umada u hayaan dayacaaan"Ayuu yiri Ra'iisul Wasaarihii shalay lagu dhawaaqay in xilkiisii laga eryey.

Dr,Cumar Cabdirashiid Cali Sharmaake oo markii uu warbaahinta la hadlayey ay dhinacyadiisa fadhiyeen Wasiiro badan oo ka tirsan Xukuumadiisa waxa uu ku hadlay hadaladii ugu kululaa oo uu warbaahinta ka sheego tan & intii uu Siyaasada Soomaaliya kusoo biiray mudo Sanad & Bilo lagu joogo,wuxuuna sheegey in uu haysto kalsooni badan oo uu ka haysto xildhibaanada Baarlamaanka Soomaaliya isla markaasna uu ku tagi karo markii uu codkooda waayo ama ay kalsoonida kala laabtaan intabadan Baarlamaanka Soomaaliya.

dhinaca kale........

Dalalka taageerada wanaagsan siiya dawladda KMG ah ee Soomaaliya ayaa qaban qaabinayay saacadihii ugu dambeeyey ee maanta in ay wafuud udiraan caasumada Soomaaliya ee Muqdisho, si ay ula kulmaan dhinacyada dawladda KMG ah ee udhaxeeyo khilaafka baahsan.

Xubnaha ugu horeeya ee hada doonaya in ay tagaan Muqdisho oo ay ku jiraan xubno ka socda Qaramada Midowbay, Midowga Africa, Midowga Yurub iyo IGAD, ayaa muhiimadoodu ay tahay in ay la kulmaan Madaxda dawladda KMG ah ee Soomaaliya, si ay uga dhaadhiciyaan in ay muhiimad tahay in wax laga qabto xaaladaha ka dhex oogan.

Laakiin xubnaha khilaafku hareeyay ayaa qaarkood sheegay in loo baahan yahay dhowrida Sharciga, markaasna ay lama huraan tahay in uu dhinac kastaa qirto dhibaatooyin adag ee uu ka galay dhanka sharuucda ay ku wada shaqeynayeen.

Wakiilka Qaramada Midowbay uqaabilsan Soomaaliya Axmad Walad Cabdalla oo la rumeysan yahay in uu qeyb wanaagsan ka yahay khilaafka dawladda KMG ah, ayaa soo dhaweeyey talaabadii uu qaaday Madaxweynaha KMG ah, laakiin soo dhaweynta Axmad waxa ay caro ku beertay golihii Xukuumada oo maanta sheegay in aysan dhicin.

Midowga Yurub, Midowga Africa iyo IGAD ayaa wafuud usoo diri doona Muqdisho maalinta berito ah, waxa ayna kulamadoodu noqon doonan kuwa leh xiisahooda, maadaama ay hada dawladda KMG ah ukala xiran yihiin aagag Siyaasadeed oo ay adag tahay in aad gudaha ugasho.

Sadexda masuul ee hada isku haya arrimaha dawladda KMG ah ayaa horay logu eedeeyey waxqabad la'aan, ayadoo hadana uu bilowday khilaaf adag, taasoo ka dhigaysa dawladda KMG ah oo maamushay 2 KM oo ay amaankeeda sugaan ciidamada AMISOM, marka kastana ay ka dhacaan qaraxyo, dilal ayaan la garan karin waxa ay ku dambeyn doonto.